Кавказра, чул ту çинче,
Пĕр-пĕччен паян ларатăп,
Хура тинĕс хĕрринче
Тĕрлĕ шухăш шухăшлатăп.
Хăть мĕнле эс ачашла,
Куç тулли хитре Кавказăм,
Юрлас килчĕ чăвашла:
«Çилĕ вĕрĕ кассăн-кассăн...»
Пит илемлĕ-çке Кавказ,
Мĕнешкел хитре çанталăк!
Хуйхă-суйхăсăр, хавас
Пурнăттăм кунта çулталăк...
Анчах пур-çке тĕнчере
Чун суйланă Шупашкарăм:
Тăвансемĕр, ман чĕре
Канăçа пĕлмест, мăнтарăн.
Чăвашлах юрлас килет,
Калаçас килет, мĕн калăн!
Таврăнсан тăван киле
Юратса мана ыталăн...
Сивĕ çилĕ вĕртĕр-и!
Эс мана ялан савсассăн —
Пулĕ хĕл те пит вĕри,
Туйăнĕ ялан Кавказăн.