Сар хĕвел салатрĕ ахахне
Ешĕл тумлă аслă çĕр çине.
Ыйхăллă, ĕшеннĕскер, хуллен
Тракторист килет хăй сменинчен.
Çак тĕлте вăл ултă çул пулман,
Çакăнти чечен хире курман.
Çитрĕ ĕнер çеç ку вырăна,
Çĕмĕрт çеçкипе сĕлтет ăна.
Тăрисен юрри янрать... Хирте
Пĕр хĕр кĕтсе илчĕ йĕкĕте.
Тин кăна вăл çитнĕ апатпа.
— Кил, çисем, — тет уçă сасăпа.
Каччă вăрттăн пăхрĕ хĕр çине,
Паллаймарĕ сарă хĕр камне.
Хăмăш пек тӳр пӳллĕ, яштака.
Шухăш вĕçрĕ, чупрĕ аякка.
— Тавтапуç, пит тутлă апату,
Пĕлейресчĕ, сан мĕнле яту?
Ăшшăн кулчĕ çамрăк хĕр вара:
— Эп санпа тĕл пулнăччĕ фронтра...