Ман тăван кĕтесри
Çутçанталăк тĕрри —
Сарлака, анлă Сурăм вăрманĕ!
Сан илемлĕ сăнна,
Сан таса сывлăшна
Кам-ха тытмĕ асра? Кам-ха манĕ?
Тăхăнсан ешĕл тум,
Ывăтсан кăтра хум
Атте сачĕ пекех туйăнаттăн.
Ырлăх-сывлăх сĕнсе,
Илĕртӳллĕн чĕнсе
Хăв патна мана кăчăк туртаттăн.
Çеçкеленнĕ вăрман,
Эс мана ачаран
Анне пек юратса çупăрлаттăн.
Чĕвĕлти сасăпа,
Чи ачаш туйăмпа
Чунăма йăпатса калаçаттăн.
Ман тăван кĕтесри
Çутçанталăк тĕрри —
Сарлака, анлă Сурăм вăрманĕ!
Сан илемлĕ сăну,
Сан таса сывлăшу
Асăмра ĕмĕр-ĕмĕр упранĕ.