Эс ман — çырма-çатраллă, ват вăрманлă,
Кăтра уй-хирлĕ, пыл сапан çаранлă...
Ялан умра эс, ман Тăван çĕршывăм —
Анне-атте Çĕршывĕ — Чăвашстанăм.
Темле терте тӳсме те хатĕр саншăн —
Сенкер çăл пек шаркан чечен юррушăн,
Ютпа хаяр, туспа ачаш чĕлхӳшĕн,
Пин-пин çулхи асамлă хĕм тĕррӳшĕн.
Ӳкес пулсан — çут çăлтăр пек çуталăп,
Чĕрем çумне тытса сана ыталăп.
Ман панă антăм, юррăм та сăмахăм
Çиçсе хĕмленĕ вутăн та ахахăн.
Килес ăрун чунне хĕртсе çунтарĕ,
Сим пек, нар пек ун пулĕ пархатарĕ.
Ялан асра, ялан умра эс манан —
Сăрнай сассиллĕ савнă Чăвашстанăм.