Часах ĕнтĕ пуçланать
Вăйлă çапăçу.
Мĕн пиллет-ши, мĕн сунать
Пире çакă кун?
Тăвăл шавлă. Халь унччен
Çумарах эс лар.
Тусăм, кăмăл туличчен
Уççăн калаçар.
Çумри лăпкă сăнсене
Кăларса сăнар,
Килти çывăх çынсене
Ыррăн асăнар.
Куçпа вĕçсĕр тĕнчене
Тишкерсе илер.
Пурнăç епле черченне
Тепĕр хут пĕлер.
Каç пулсассăн, шăплансан,
Телейсем çинчен
Çыру çырăпăр ларса
Инçетрен инçе.
Сан та, ман ат инçетре
Пĕлĕш-хурăнташ.
Ак пуçланчĕ... Çĕр чĕтрет.
Çирĕп пул, юлташ!