Çак çуркунне пулсассăн,
Типĕ курăк ешерет.
Вăрман çулçа кăларсан,
Кайăк сасси илтĕнет.
Хĕрлĕ хĕвел пăхать-çке,
Курăк ӳсет ярăнса.
Тĕрлĕ çеçке ӳсет-çке,
Çынсем çӳреç савăнса.
Çак тусем те çуркунне
Пит илемлĕн курăнаç.
Тĕрлĕ тĕслĕ илемлĕ,
Хитре тумтир тăхăнаç.
Çеçкийĕсем ту çинче
Улан-улан курăнаç.
Лайăх пăхсан, çеçкесем
Кулнă пекех туйăнаç.
Çеçке çинче пыл хуртсем
Вĕçе-вĕçе çӳреççĕ;
Пылне пухса илсессĕн,
Килне вĕçсе каяççĕ.