Сайта кӗр | Регистраци | Сайта кӗрсен унпа туллин усӑ курма пулӗ
 +11.0 °C
Ӑшӑ сӑмах — ҫу кунӗ, сивӗ сӑмах — хӗл кунӗ.
[ваттисен сӑмахӗ]
 

Никама та... Ниме те... (Василий Антонов)

Чи хӑрушӑ та юнлӑ ҫуй пулчӗ вӑл ахӑр,
Вӑхӑт витӗр паян та килет йывӑр ахрӑм,
Кӑн-кӑвак тӳпере явӑнать пек ҫӑхан.
Вилнисем, эсӗр куҫ умӗнчех ак тӑратӑр —
Мрамор палӑк ҫинче хушаматӑр та ятӑр:
Никама та манман, нимӗн те манӑҫман...

Ҫӗнтерӳҫӗсем ҫитрӗҫ — телейлӗ те шавлӑ,
Куҫсӑр, сусӑр, чӑлах, кам урасӑр — туяллӑ.
Хисеппе чап ҫинчен ун чухне шутламан.
Юхӑнса ҫитнӗ хуҫалӑха ҫӗнетесшӗн
Тӑрӑшаҫҫӗ хӑйсемшӗн те пуҫ хунисемшӗн:
Никама та манман, нимӗн те манӑҫман.

Юлашки вӑрҫӑ пулӗ тесе ӗмӗтленнӗ,
Малашне ырӑ ҫеҫ пуласса пит ӗненнӗ,
Усала тӗнчере имӗш вырӑн юлман.
Ҫук: паян ывӑл-мӑнукӗсем юн тӑкаҫҫӗ,
Вӗсене авалхи йӑлапа пытараҫҫӗ:
Никама та манман, нимӗн те манӑҫман.

Шел, чакать кунсерен ҫӗнтерӳҫӗсен шучӗ —
Пӗтерет ватлӑх та манайми вӑрҫӑ вучӗ,
Эсӗр йӗрсӗр ҫапах ҫӗр ҫинчен ҫухалман.
Мучи-кинемейсем, яланах асра юлтӑр,
Ӗҫӗрпе ӗмӗре пыракан юрӑ пултӑр:
Никама та манман, нимӗн те манӑҫман.

Ҫавӑн пекех

Василий Антоновӑн ытти сӑввисене вулӑр


 
Статья каҫми :: Пичет версиӗ

Admin тӳрлетнӗ, информацие 2006-07-06 23:27:33 вӑхӑтра улӑштарнӑ. 2399 хут пӑхнӑ.
Orphus

Баннерсем

Шутлавҫӑсем

 
Сайт пирки | Пулӑшу | Статистика
(c) 2005-2018 Chuvash.Org
Сайтри материалсене (ытти ҫӑлкуҫсенчен илнисемсӗр пуҫне) CreativeCommons Attribution-ShareAlike 3.0 лицензипе килӗшӳллӗн усӑ курма пулать. Сайтпа ҫыхӑннӑ ыйтусене кунта ярӑр: site(a)chuvash.org