::Чӑвашсемшӗн эп кӗрешӗп (Пайтул)

Кӑйкӑр кайӑк — савнӑ кайӑк,
Эс вӗҫетӗн тӳпере.
Эс ҫӳлте чухне пит лайӑх,
Вутлӑ ҫулӑм чӗрере.

Санпала пӗрле вӗҫесчӗ,
Ҫавалтан Атӑл таран.
Савнӑ ҫӗрӗме пиллесчӗ
Араскал, телей чунран.

Чӑваш ҫӗрӗ питӗ чаплӑ —
Ӑмсанаҫҫӗ тӑшмансем.
Пӗлӗр халь: эп Пайтул ятлӑ,
Сире сутмӑп, чӑвашсем!..

Чӑвашсемшӗн эп кӗрешӗп
Пӗрчӗ юн тумламчченех.
Хампала пӗрле чӗнетӗп
Чи маттур йӗкӗтсене.

1937 ҫулта Марка ялӗнчи Кириле ятлӑ ватӑ юрӑҫран П.П. Юркин тӗпчевҫӗ ҫырса илнӗ.