Спиридонов Михаил Васильевич — совет саманин тата Раҫҫейӗн производствӑра мала тухнӑ ҫынни, водитель, бригадир. Раҫҫей Федерацийӗн тава тивӗҫлӗ строителӗ. Шупашкарти пысӑк промышленность предприятийӗсене тата транспорт инфраструктурине тӑвассине пысӑк тӳпе хывнӑ.

Пурнӑҫӗ

Спиридонов Михаил Васильевич 1935 ҫулхи юпан 7-мӗшӗнче Чӑваш АССРӗн Вӑрнар районӗнчи Тулти Пӑртас (1964 ҫултанпа — Пӑртас) ялӗнче ҫуралнӑ.

1961 ҫултанпа Шупашкарти 2-мӗш автотранспорт предприятийӗнче водитель пулса ӗҫленӗ. Нумай ҫул хушши Шупашкар хулин промышленность потенциалне аталантарма хастар хутшӑннӑ. КрАЗ самосвалӗсен водителӗсен бригадине ертсе пынӑ. Ҫамрӑксен наставникӗ пулнӑ.

Ӗҫӗ-хӗлӗ

М. В. Спиридонов Шупашкарти пысӑк промышленность предприятийӗсене тунӑ ҫӗре хутшӑннӑ:

• промышленность тракторӗсен савучӗ
• Приборсем тӑвакан савут

Ҫавӑн пекех ҫак предприятисен цехӗсене реконструкцилеме хутшӑннӑ:

• Чапаев ячӗллӗ савут
• Агрегат савучӗ
• «Чӑвашкабель» савут

Унсӑр пуҫне, «Вятка» автомобиль ҫулне тунӑ ҫӗре хутшӑннӑ.

Хисепӗсем

• Раҫҫей Федерацийӗн тава тивӗҫлӗ строителӗ (2002).