Ҫавӑн пекех пӑхӑр: Кушлавӑш

Кушлавӑш (выр. Кошлоуши) — Чӑваш Республикинчи Вӑрнар районӗнчи ял. Ершепуҫ ял тӑрӑхӗн шутне кӗрет.

Географийӗ

Ял Чӑваш Енӗн варринче Шупашкартан — 102 км, район центрӗнчен, Вӑрнар поселокӗнчен, — 11 км, чи ҫывӑх чукун ҫул станцийӗнчен 11 км аякра вырнаҫнӑ.

Историйӗ

Яла 1723–1724 ҫулсенче Алмантай ялӗнчен куҫса килнӗ ҫынсем никӗсленӗ. Истори ячӗсем: Новопоселённая Алмандеева, Кошлауши тож; Кошлоуши, Рунга тож.

Ҫыннисем — чӑвашсем, 1724 ҫулччен ясаклӑ хресченсен шутне кӗнӗ, 1866 ҫулччен — патшалӑх хресченӗсен шутне. Тӗп ӗҫӗсем — ҫӗр ӗҫӗ, выльӑх-чӗрлӗх ӗрчетесси, атӑ-пушмак ҫӗлесси, тимӗрҫӗ ӗҫӗ, вӑрман хатӗрлесси.

Ялта Сӑваплӑ Троица чиркӗвӗ ӗҫленӗ (1841–1938, 1989 ҫулта каллех уҫӑлнӑ). XVIII ӗмӗр — XX ӗмӗр пуҫламӑшӗнче пасар пулнӑ. 1845 ҫултанпа Патшалӑх пурлӑхӗн министерствин шкулӗ ӗҫленӗ, 1874 ҫулхи пушӑн 26-мӗшӗнчен пуҫласа — земство училищи.

1931 ҫулта «Крупская» колхоз йӗркеленнӗ. Администраци енӗпе ял XVIII ӗмӗртен 1927 ҫулччен Ҫӗрпӳ уесӗнчи Рункӑ вулӑсӗнче, Етӗрне уесӗн Пайсупак, Кушлавӑш, Тусай вулӑсӗсенче, 1927 ҫултанпа Вӑрнар районӗнче шутланнӑ.

Халӑх йышӗ

2010 ҫулхи халӑх ҫыравӗн даннӑйӗпе ялта 103 ҫын пурӑннӑ (56 арҫын, 47 хӗрарӑм). 2012 ҫулхи даннӑйпе — 112 ҫын. Ытларахӑшӗ — чӑвашсем (2002 ҫулхи халӑх ҫыравӗпе 99%).

Халӑх йышӗ ҫулсем тӑрӑх ҫапла улшӑннӑ:

• 1795 (икӗ выҫӑлккӑпа пӗрле) — 106 кил, 495 арҫын, 494 хӗрарӑм;
• 1858 — 65 арҫын, 68 хӗрарӑм;
• 1897 — 129 арҫын, 148 хӗрарӑм;
• 1926 — 73 кил, 159 арҫын, 182 хӗрарӑм;
• 1939 — 148 арҫын, 167 хӗрарӑм;
• 1979 — 103 арҫын, 115 хӗрарӑм;
• 2002 — 52 кил, 118 ҫын (56 арҫын, 62 хӗрарӑм);
• 2010 — 41 харпӑр хуҫалӑх, 103 ҫын (56 арҫын, 47 хӗрарӑм).

Экономика

Экономикӑн никӗсӗ — ял хуҫалӑх производстви. 2010 ҫул тӗлне «Агрохмель» тулли мар яваплӑ общество ӗҫленӗ.