Кăçал çапла Михала,
Така пуснă ятпала,
Чĕнсе килчĕ хăнана
Хайхи услап Ваççана,
Вĕçкĕн, мăран Мируна.
Анаткасри Антуна...
Эрех-сăра тăкăнать,
Урай кашти авăнать.
Чăн авалхи йĕркепе
Ваççа сыпать черккепе,
Мирун ĕçет куркапа,
Антун ярать алтăрпа...
Ĕçсен-ĕçсен, урмăшсан,
Ăса-пуçа çухатсан,
Хайхи туссем, пĕлĕшсем,
Намăс-симĕс çук çынсем,
Сикрĕç-тăчĕç çапăçма,
Пĕрне-пĕри çунтарма.
Хайхи ӳсĕр çиллипе
Ваççа çапать черккепе,
Мирун парать куркапа,
Антун ярать алтăрпа.
Ак тамаша, япала,
Мĕскер ĕнтĕ тумалла, —
Мĕкĕреççĕ вăкăрла,
Çухăраççĕ сысналла...
— Така ĕçки пит хакла
ларчĕ, — тет халь Михала.
Ваççан хăлхи янăрать,
Мирунăн мăй ыратать,
Антун аран уткалать,
Çаплах укол тутарать.
Ирĕк парăр калама:
Вăхăт ĕнтĕ ăнланма —
Çитет ĕçсе ашкăнма,
Çын сăнарне çухатма.