Сĕлевĕс

Борис Борлен | Сăвă | 665

Çук, сайхах1 вăл касаймасть,

Сарлăк2, сырăш3 тăваймасть,

Килĕ-çуртĕнче сапрам,

Урăх мĕн тата калам?

 

Пĕчĕкрен çапла супьях4,

Састăклă5 та сăрхăватлă6,

Суптăркка7 вăл, чăн-чăнах,

Сехметпе8 тахçан туслашнă.

 

Сăянташлă9 та саланкăр,

Супинкки10 çукпа пĕрех,

Сыхчă11 хăй ăна хăтартăр

Çичĕ тĕслĕ чир-чĕртен.

__

Сĕлевĕс — кахал, лодырь

 
1 Сайхах — карта тытмалли вĕрлек (йывăç)
2 Сарлăк — «сар» сăмахран, хăмар сарлăкĕ
3 Сырăш — выльăха апат памалли такана
4 Супьях — тирпейсĕр
5 Састăк — селĕп
6 Сăрхăват — чир (лишай)
7 Суптăркка — асапланса йӳтесе çитнĕ.
8 Сехмет—хурлăх
9 Сăянташлă — тытамаклă
10 Супинкке — пурлăх, япала тата ыт.
11 Сыхчă—пӳлĕхçĕ