Эп вилсен...
Эп вилсен — мана пытарăр
Çӳл[л]ĕ ту тăрне.
Йăмрасем лартса хăварăр
Ман тăпра çине.
Ман çинчен пĕтĕм çĕршывăм
Курăнтăр вара,
Тăпрам çинчен курма пултăр
Ват Шупашкара.
Эпĕ выртăп... выртăп... Юлĕ
Вăхăт каялла:
Чăваш чĕлхи пурнăç майĕ
Кайĕ малалла.
Вăхăт çитĕ — Чăваш çĕрĕн
Кăмăллă чĕлхи
Чаплă пулĕ, — вăлах пулĕ
Çамрăк чун пахи.
Пулĕç ĕмĕрлĕх илемлĕ
Сăвă-юрăсем.
Пулĕç аслă, çивĕч ăслă
Кĕнекеçĕсем.
Савнă çĕршывăмăн пулĕç
Чаплă сăвăçсем,
Чаплă та илемлĕ çырĕç
Ун чухне вĕсем.
— Чăваш çыннин чĕлхи чухăн, —
Теме хăякан
Пулĕ-ши ун чух, пĕлесчĕ,
Кураясчĕ ман!
Тусăмсем! Ун чух çул майĕ
Ман çине пырса
Юрă юрласа кăтартăр,
Сăвă каласа.
Ун чухне ман пĕлес килĕ
Сăвăссен ятне
Тата вĕсенчен хăш аслă,
Хăшĕ чаплине.
Юрăсемпе эсĕр мухтăр
Сăвăçсен ятне,
Хытă сасăсемпе юрлăр
Вĕсен сăввине.
Вара эпĕ хамах пĕлĕп
Сăвăçсен ятне:
Пĕлĕп Чăваш çырулăхĕ
Епле чаплине.
Чăвашра çĕнĕрен сăвăç
Çуралмассерен
Ман тăпра çине сар кайăк
Пытăр ир çинчен.
Йăмрасем çине ларайтăр
Хĕвел ăшшине,
Янра юрăпа мухтатăр
Чăваш чĕлхине.
Тăван çĕршыв çырулăхĕн
Илемĕ çинчен,
Çамрăксем тăван чĕлхешĕн
Тăрăшни çинчен
Сар кайăк юрласа патăр
Йăмра тăрринчен...
Йăлтăр хĕвел йăлтăртаттăр
Çут пĕлĕт çинчен.
Симĕс курăкпа тумлантăр
Ман тăлăх тăпра;
Хĕрлĕ чечексем ешерччĕр
Ман вырăн тавра...
Çĕршывăма тăван халăх
Хавасламасан,
Чун савнă чăваш чĕлхийĕ
Пĕтмелле пулсан —
Усал курăк та ан шăттăр
Ман тăпра çине:
Çĕр çурăлтăр та çĕр çăттăр
Вил шăммăмсене.
1921 ç. пуш
Шупашкар
Вулавçăсен шухăшĕ
Çĕнĕ комментари хуш
Володя (2014-05-29 18:45:29):
Ну, почему прекрасные стихи завершать обычным чувашским "ведьмованием"
влад маскай (2018-04-09 00:23:13):
Каçарăр та, анчах чи малтан çак Валутькан шухăш - кăмăлĕ çинчен пĕр -икĕ сăмах...Санпа, чĕрре кĕрсе "тытăшса" кайма шухăшăм çук ман. Çавăнпа, эсĕ ытла çамрăк иккенни курăнчĕ те - "шыв сыпаймарăм" ĕнтĕ çăвара. Пĕр енчен. Эс çак сăвва вĕçне çитиччен вуласа тухма вăй çитертĕн пулсан, сан чунăнта та чăвашлăх тата та вăйлăрах пултăр тени илтĕнет пек. Выранта тăрайман, ташлама юратакансен те çапла шухăшĕсем. Вĕсене те хурланса, амăшсене сене шеллесе юрламалли юрăсем - юрă мар. Эсĕ те çавах мар- и? Апла ан пултăр тесен санăн "срочно" Çеçпĕлĕн биографине вуласа тухса пĕр- пĕр аслăрах, çак ыйтăва татса - уçса пама пултараканпа пĕрте- пĕр калаçу ирттермелле пек туйăнчĕ мана. Çавă çес. Кун пек Аслă ятлă Пиччесен сăвви- калавне хаклама çамрăксен тăхтарах тăни вырăнлăрах пек туйăнать мана. Хăван юлташун-тусун "произведеннине" - хăть те тем чул "шĕкĕлчеле" Тав сăмахĕ анчах илĕтĕн. Классиксем пирĕн - яланлăха! Вĕсем "шĕкелчесем" витĕр, хююернĕ тимĕр евĕр, тасалса та çирĕпленсе малашнехи ăрусем валли, пире валли те сыхланса юлнă.! Тивер мар вĕсен сумлăне!!!