Тутирек


Хусанăн хĕрĕх алăклă

Хăруш тĕрми çинчен хайланă

Юрру ăша хĕртсессĕн те

Санах эп куртăм, Тутирекĕм.

Хăрах куçпа пулсассăн та

Тахçантанпах курасшăн эпĕ

Çап-çутă кĕмĕл алтăрна, —

Ăна Пăкач-мĕн парнеленĕ.

Курассăм çеç те мар, хуллен

Хавас ăна тытса пăхма та.

Асамлă вăй кӳрессĕнех

Шав туйăнса тăрать вăл маншăн.

Пăлхавçăсен йышне пухма

Сана çĕкленĕ харсăр кăмăл

Унта упраннăн ăш вĕçет,

Чĕнсе тăрать таса хăвачĕ.

Пур халăх ĕçченне савса

Мухтавлă вырăс утаманĕ

Ирĕклĕхе çĕнсе илме

Сана ал тăсрĕ ютшăнмасăр.

Чăвашсене пухас тесе

Ялтан яла пайтах хутларăн,

Улпут-хуçа сăнни тĕлне

Пулассинчен те шикленмерĕн.

Ĕç çыннисен кĕрешĕвне

Эс ĕмĕт çитнĕ пек вăй хутăн.

Тĕрме нуши лексессĕн те

Пачах та ӳкĕнмерĕн уншăн.

Ахальтен мар чунна-варна

Пусмăрçăсен кулли витернĕ.

Çав ирсĕр мăшкăл-асапа

Эс каçармашкăн пултараймăн.

Музейсенче çӳренĕ чух

Сан алтăрна курса пулмарĕ.

Кăмрăкланман-тăр вут çинче,

Çунсах кайман-тăр кĕмĕл савăт.

Кĕл пулнă çурт вырăнĕнче

Ăна тимлех, тен, шыраман-тăр.

Унта çитсе чакаланма

Тĕпчевçĕ тусăм та тĕв турĕ.

Сан кăмăлу та хускалсан

Атя пĕрле, тăванăм, эс те.

Тен, тунсăхларĕ халиччен

Пире кĕтсе çав кĕмĕл алтăр?

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: