Çуллахи каç


Шур пĕлĕтсем шăваççĕ анăçа —

Пĕри пулать лаша, тепри тĕве...

Кун иртрĕ. Тăрса юлчĕ манăçа

Никамшăн палăрми пур вак-тĕвек.

Ял-йышăмсем ĕçлерĕç уй-хирте,

Анне тăрмашрĕ кил ăш-чиккипе:

Эп килнĕ хăнана, вăл хĕпĕртет

Чун патĕнчи пĕр ĕмĕт çитнĕ пек.

Çеремлĕ картишне ларать сĕтел,

Сĕтел çине сар кăкшăм вырнаçать.

Хӳме çурăкĕнчен каçхи хĕвел

Кĕрекене сентел тĕспе сăрлать.

Эпир сăра ĕçетпĕр тав туса,

Эп кил-çурта сунатăп перекет.

Анчах ман урăххи килет аса,

Куç умĕнче йăлт урăх кĕреке...

Анне сисет. Вара эп сан çинчен

Ирĕксĕрех кала пуçлап ăна.

Ĕçетĕп те — куркамăн тĕпĕнче

Куратăп санăн тунсăхлă сăнна.

Эс — ман хăймаланса йӳçен сăра,

Эс — ман тулли куркам, ман вăй кӳрен!

Санран килет телейĕм пурнăçра,

Чĕрем сана чăнне калать, ĕнен...

Пӳртçи тĕлнех ак хыпрĕ Çич çăлтăр —

Ĕçсе ӳпĕнтерейнĕ алтăр пек.

Ан тив, çаплах кун-çул та çутăлтăр,

Хур кайăк Çулĕ пек ялтратăр тек.

Шав тăсăлать-ха пирĕн калаçу:

Тӳлек уяр! Ăçтан халех выртан?

Умра икерчĕ, тăвараллă çу,

Умра мухтавлă, ĕмĕрхи шăрттан.

Вăл, ахăр, астăвать Аттиллăна,

Ăна тутаннă Чингисхан, Тимур;

Хаяр Иван юратнă тет ăна...

Шăрттан! Ун хăйĕн кунĕ-çулĕ пур.

Сып-сывă та сĕтеклĕ хальчченех,

Сыв пултăр малашне те вăл эппин!

Çĕршер çул витĕр çитнĕ кучченеç

Кĕрекерен вăл тухмĕ паян тин...

Вăрах пырать-ха пирĕн калаçу.

Таçта пытанчĕ уйăх ывăси.

Эпир иксĕмĕрех, никам та çук:

Анне те эпĕ — каскăн йăх асси.

Ак Алтăр-Çăлтăр та çавăрăнать,

Атăлалла тăсать хăй аврине.

Тытсам эс, тусăм, тытса чар ăна,

Астив савса сĕнен тав куркине.

Мĕнпе эс йăпанатăн-ши çак каç?

Санран хыпар та çук, чиперĕмçĕм!

Кунти лĕп çил вĕçсе çитсен кас-кас,

Мана эс асăнса илмерĕн-шим?

Епле пулсассăн та, паян сана

Пуриншĕн те чунтан эп тав тăвап.

Никам та мар — пĕр эс, пĕр эс кăна

Мана тытса çыртартăн çак сăвва.

Çавăн пекех пăхăр

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: