Çутă сăнар


Юр пĕрчисем вĕлтĕртетсе вĕçеççĕ.

Вĕсем умра ташланине пăхса

Сана асилтĕм, кăмăллă аннеçем,

Шап-шурă çӳçлĕн тăтăн эс тухса.

 

Тавах сана, асаилӳ саманчĕ:

Каллех кĕтет тăрна сассиллĕ ир.

Каллех хĕвел йăл-йăл кулса вăранчĕ,

Шкула утатпăр ушкăнпа эпир.

 

«Аван вĕренĕр, тимлĕ пулăр», — тетĕн.

Куллен илтетпĕр ăшă сăмахна.

Телейлĕ пурнăç, савăнăç пиллетĕн,

Чи ырă шухăш çутатать сăнна.

 

Çу кунĕсем кĕре кĕрсе çухалчĕç,

Сар çулçăсем те пулчĕç юр айне.

Çурхи шыв пек, çулсем иртсе ăсанчĕç —

Ӳссе çитсе çьш иултăмăр, анне.

 

Кайран пире инçе çула ăсатрăн.

Тӳр кăмăллăх сунса кашни ĕçре.

Этем ятне çӳлте тытма пил патăн,

Сăмахусем паян та чĕрере.

 

Мĕнле мăскал çине хурса виçем-ши

Сана калас сăмахсене пухса?

...Çаплах пире шкултан кĕтсе илесшĕн

Хапха умне тăратăн пек тухса.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: