Сайта кӗр | Регистраци | Сайта кӗрсен унпа туллин усӑ курма пулӗ
 +14.5 °C
Ҫурхи кун кӗр тӑрантарать.
[ваттисен сӑмахӗ]
 

Хыпарсен ҫыххи: Раҫҫейре

Раҫҫейре
Ольга Портнова Игорь Дадиани хатӗрленӗ тумпа
Ольга Портнова Игорь Дадиани хатӗрленӗ тумпа

Ака уйӑхӗн 15-мӗшӗнче Мускавра «Раҫҫей мисӗ—2017» наци конкурсӗн финалӗ иртнӗ. Шурӑ ылтӑнран хатӗрленӗ, 1 миллион доллар тӑракан коронӑна тивӗҫме тата тӗнчери илемлӗх конкурсӗсене хутшӑнма Чӑваш Енри тӑватӑ пике тӗмсӗлнӗ. Ҫавсен шутӗнче — 19 ҫулти Анна Антонова (ӑна Чӑваш Енрен тесе паллаштарчӗҫ), 20-ри Анастасия Рыжкова сцена ҫине Шупашкар ячӗпе тухрӗ, 23-ри Кристина Андреева — Ҫӗнӗ Шупашкар ячӗпе. Чӑваш патшалӑх университетӗнче психолога вӗренекен Ольга Портнова та конкурса хутшӑннӑ. Иркутскра ҫуралнӑ пике хӑйӗн тӑван хулин ячӗпе конкурса хутшӑннӑ.

«Раҫҫей мисӗ» ята Свердловск облаҫӗнчи Полина Попова ҫӗнсе илнӗ. Ӑна 3 миллион тенкӗ укҫа тата автомобиль парнеленӗ. Унсӑр пуҫне ҫӗнтерӳҫӗ пикене тӗнчен кирек хӑш ҫӗршывӗнче вӗренме май туса параҫҫӗ. Анчах кӑҫалхи ҫӗнтерӳҫӗ Раҫҫейрех вӗренес шухӑшлине пӗлтернӗ.

 

Раҫҫейре

Кӑҫал Раҫҫей музыка конкурсне «Евровидение» хутшӑнмӗ. Чылай вӑхӑт шӑв-шав пулнӑ хыҫҫӑн пирӗн ҫӗршыв унта конкурсҫа яма хирӗҫленӗ.

«Евровидение» кӳмепе ҫӳрекен Юлия Самойловӑна яма палӑртнӑ. Ҫак кунсенче Раҫҫей конкурс йӗркелӳҫисем сӗннӗ условисем тивӗҫтерменни пирки пӗлтернӗ. Кунсӑр пуҫне Раҫҫей «Евровидение» тӳрӗ эфирта кӑтартмӗ. Йӗркелӳҫӗсем артиста улӑштарма е видеокӗпер урлӑ юрлама сӗннӗ.

Юлия Самойлова Крыма кайса килнӗрен Украинӑри хӑрушсӑрлӑх служби ӑна хӑйсен ҫӗршывне 3 ҫуллӑха кӗме чарнӑ. Ку шӑв-шав ҫакӑнпа ҫыхӑннӑ. «Евровиденин» сӑнав канашӗн председателӗ Украина влаҫӗсен хӑтланӑвӗ конкурспа килӗшсе тӑманнине палӑртнӑ.

Хыпар ҫӑлкуҫӗ: http://pg21.ru/news/41092
 

Раҫҫейре

Чӑваш Енри хӗре Мускаври хваттерте читлӗхри пек усранӑ. Мускавра ҫуралса ӳснӗ арҫын ӑна унтан кӑларса яман. Арҫын чӑваш хӗрне пӗрмай мӑшкӑлланӑ. Кун пирки www.mskagency.ru порталта пӗлтернӗ.

Чӑваш Енрен Мускава кайнӑ 20 ҫулти хӗре Мускаври пӗр пульницӑн нейрохирурги уйрӑмне илсе килнӗ. Унӑн пуҫӗ суранланни, пуҫ мими чӗтренни паллӑ. Кӗлетки ҫинче пӗҫертнӗ, каснӑ вырӑнсем пулнӑ.

Хӗр каланӑ тӑрӑх, кӑҫалхи нарӑс уйӑхӗнчен пуҫласа акан пуҫламӑшӗччен ӑна Мускавра пурӑнакан, ниҫта та ӗҫлемен 26-ри арҫын хваттерте усранӑ. Вӑл хӗре мӑшкӑлланӑ вӑхӑтра вӑйлӑ витӗм кӳрекен препаратсем ӗҫтернӗ.

Полицисем ҫав арҫынна хваттерӗнче тытса чарнӑ. Ун тӗлӗшпе пуҫиле ӗҫ пуҫарнӑ.

Хыпар ҫӑлкуҫӗ: http://pg21.ru/news/41017
 

Раҫҫейре

Тутарстанри Арбитраж сучӗ Татфондбанка панкрут тесе палӑртнӑ. Ун тӗлӗшпе конкурс производстви уҫнӑ. Унӑн срокӗ — 1 ҫул.

Тӗп банкӑн элчи Дмитрий Малиновский ларура банкӑн пурлӑхӗ 71,393 миллиард тенкӗпе танлашнине пӗлтернӗ. Банкӑн обязательстви — 189,74 миллиард тенкӗ.

Татфондбанкӑн Тӗп банк умӗнчи парӑмӗ — 3 миллиард тенкӗ, ытти кредит организацийӗ умӗнче — 27 миллиард тенкӗ, клиентсен укҫи — 109,6 миллиард тенкӗ.

Аса илтерер: Тӗп банк Татфондбанкӑн лицензине пуш уйӑхӗн 3-мӗшӗнче илнӗ. Тӗп банк палӑртнӑ тӑрӑх, Татфондбанкӑн капиталӗнчи «шӑтӑк» 97 миллиард тенкӗпе танлашнӑ.

 

Раҫҫейре

«Студентсен ТЭФИ» конкурсра пирӗн ентеш Дарья Никонорова ҫӗнтернӗ. Финал ака уйӑхӗн 5–8-мӗшӗсенче Дон ҫинчи Ростов хулинче иртнӗ.

Дарья Никонорова И.Н.Ульянов ячӗллӗ ЧПУн вырӑс тата чӑваш филологийӗпе журналистика факультетӗнче журналистика уйрӑмӗнче вӗренет. Вӑл конкурсра «ылтӑн» диплома тата парнене тивӗҫнӗ.

Пӗтӗм Раҫҫейри «Студентсен ТЭФИ» телекурав конкурсне Раҫҫей телекурав академийӗ ирттерет. Кӑҫал унта 55 аслӑ шкултан 359 ӗҫ ҫитнӗ.

Пирӗн ентеш «Пысӑк Ҫулҫӳрев» проектпа «Телекурав программин\фильмӗн продюсерӗ» номинацире ҫӗнтернӗ. Мала тухнисене паллӑ журналистсем чысланӑ: Андрей Максимов, Арина Шарапова, Дмитрий Дибров, Вадим Такменев, Елена Афанасьева.

 

Раҫҫейре
Кристина Андреевӑпа Анна Антонова
Кристина Андреевӑпа Анна Антонова

«Раҫҫей мисӗ» конкурса Чӑваш Енри тӑватӑ чиперук хутшӑнать. 19 ҫулти Анна Антонова Чӑваш Ен чысне хӳтӗлет. 20-ри Анастасия Рыжкова — Шупашкар, 23 ҫулти Кристина Андреева — Ҫӗнӗ Шупашкар, 21 ҫулти Ольга Портнова Иркутск чысне хӳтӗлеҫҫӗ.

Нумаях пулмасть наци костюмӗсен конкурсӗ пулнӑ. Пирӗн ентешсем те унта чӑвашсен илемлӗ кӗписене кӑтартнӑ. Ҫавӑн пекех вӗсем хӑйсен пултарулӑхӗпе паллаштарнӑ. Пӗрисем ташланӑ, теприсем картина ӳкернӗ.

Конкурс йӗркелӳҫисем ҫӗнтерӳҫе суйлама йывӑр пулассине туяҫҫӗ. Ара, пикесем пӗри тепринчен маттур, хитре. Жюри пайташӗсене наци тумӗсен конкурсӗ питӗ килӗшнӗ. Чиперуксем илемлӗ тумсемпе тухса хӑйсен регионне тивӗҫлипе хӳтӗленӗ. Жюри те, чиперуксем те конкурс пӗтӗмлетӗвне чӑтӑмсӑррӑн кӗтеҫҫӗ.

Хыпар ҫӑлкуҫӗ: http://pg21.ru/news/40882
 

Раҫҫейре
Видеокамерӑна лекнӗ ҫын (вӑл хӑй полицие килсе айӑплӑ маррине пӗлтернӗ)
Видеокамерӑна лекнӗ ҫын (вӑл хӑй полицие килсе айӑплӑ маррине пӗлтернӗ)

Ӗнер Питӗрте метрора сирпӗнӳ пулни пирки Чӑваш халӑх сайчӗ пӗлтернӗччӗ. Юлашки официаллӑ даннӑйсене ӗненес-тӗк, унта 10 ҫын вилнӗ, 47-ӗн аманнӑ.

РФ сывлӑх сыхлавӗн министрӗ Вероника Скворцова пӗлтернӗ тӑрӑх, 7 пассажир взрыв вӑхӑтӗнче вилнӗ. 2 ҫын пульницӑра сывлама пӑрахнӑ, тепӗр 1 ҫын пульницӑна илсе кайнӑ чухне куҫне ӗмӗрлӗхех хупнӑ. Аманнӑ 47 пациентран 6-шӗн сывлӑхӗ йывӑртарах-ха.

Следстви комитечӗ ку теракт пулнӑ тесе шухӑшлать. Питӗрти метрополитена икӗ ҫын сирпӗтме пултарнӑ. Ҫынсем курнинчен ҫакӑ паллӑ: террорист малтан портфель хӑварнӑ та тепӗр вакуна куҫнӑ. Сирпӗннӗ хыҫҫан алӑксем уҫӑлман, пассажирсем чӳречерен тухнӑ.

Иккӗмӗш бомба пулнине официаллӑ майпа ҫирӗплетнӗ. Ӑна «Площадь восстания» (чӑв. Пӑлхав тӳремӗ) станцире хӑварнӑ. Телее, ӑна вӑхӑтра тупнӑ.

Видокамерӑсем теракта тума пултарнӑ ҫынна ӳкерсе юлнӑ. Анчах ҫав ҫын кайран полицие хӑй килнӗ те айӑплӑ маррине пӗлтернӗ. Халӗ «Теракт» статьяпа пуҫиле ӗҫ пуҫарнӑ. Анчах ытти версие те тишкереҫҫӗ.

Хыпар ҫӑлкуҫӗ: http://pg21.ru/news/40874
 

Раҫҫейре

Иркутск облаҫӗнче ҫынсем фанфурик ӗҫсе наркӑмӑшланса вилнӗ хыҫҫӑн Раҫҫейре ҫак шӗвеке сутма чарнӑ. Ку чару вӑхӑтлӑха кӑна пулнӑччӗ.

Анчах малашне те фанфурик суттармӗҫ. Раҫҫейри тӗп санитар тухтӑрӗ Анна Попова ку чарӑва татах тӑснӑ. Йышӑнупа килӗшӳллӗн, фанфурика тепӗр 90 кун сутма юрамасть.

Документра палӑртнӑ тӑрӑх, 28 процент ытларах спиртлӑ шӗвексене сутма юрамасть. Ҫавӑн пекех спиртран тунӑ ароматизаторсемпе хушкӑчсем те ҫак списока кӗнӗ. Кантӑк тасатмалли шӗвеке ҫеҫ пырса тивмест ку.

Аса илтерер: спиртлӑ шӗвексене 2016 ҫулхи раштав уйӑхӗн 25-мӗшӗнче сутма чарнӑ. Ку чарӑва икӗ хут тӑснӑ ӗнтӗ.

 

Раҫҫейре

Паян Питӗрте «Технологический институт» тата «Сенная площадь» станцийӗсен ҫывӑхӗнче 14 сехет те 40 минутра метро вакунӗнче взрыв пулнӑ. Наци антитеррор комитечӗ пӗлтернӗ тӑрах, хальлӗхе паллӑ мар взрыв хатӗрӗ сирпӗннӗ. Вырӑнта ФСБ ӗҫченӗсем ӗҫлеҫҫӗ.

Взрыв хыҫҫӑнах пассажирсене эвакуациленӗ, суранланнисене пулӑшу кӳнӗ. Питӗрти прокуратура ку ӗҫ тӗлӗшпе тӗрӗслев ирттерет. Ӑна хула прокурорӗ Сергей Литвиненко сӑнаса тӑрӗ. Вӑл пӑтӑрмах вырӑнне ҫитнӗ.

Малтанах метрори взрывра 10 ҫын вилни пирки пӗлтернӗ. Кайран ку хисеп 9-па танлашнӑ. Взрыв вӑхӑтӗнче 20 ытла ҫын аманнӑ. Халӗ вӗсене психологи тата медицина пулӑшӑвӗ кӳреҫҫӗ.

 

Раҫҫейре

Раҫҫейре эрех хакне хӑпартасшӑн. РФ Финанс министерствине ҫур литр эрех хакне 219 тенкӗ таран ҫитерме хушнӑ. Кун пирки «Интерфакс» пӗлтерет.

Аса илтерер: халӗ ҫур литр эрех сахалтан та 190 тенкӗ тӑрать. Унӑн хакне 29 тенкӗ ӳстересшӗн. Документа Кремльте пӑхса тухӗҫ, ака уйӑхӗн 1-мӗшӗ тӗлне хатӗрлеме пӗтерӗҫ.

Рф Правительствинче ку ыйту пирки тахҫанах калаҫаҫҫӗ. Эрех хакне ӳстересси пирки кӑрлач тата нарӑс уйӑхӗсенче сӑмах хускатнӑ.

Эрех тенӗрен. Нумаях пулмасть Шупашкарта 26 пин литр суя эрех тупнӑ, ӑна хуҫисенчен туртса илнӗ. Кун пирки те Чӑваш халӑх сайтӗнче хыпарланӑччӗ.

Хыпар ҫӑлкуҫӗ: http://pg21.ru/news/40626
 

Страницӑсем: 1, 2, 3, [4], 5, 6, 7, 8, 9, 10, 11, 12, 13, 14, ...48
Orphus

Радио (23.07.2017)

21:00
 
Каçхи микс (12+)
22:00
 
Юрă вăчăри (12+)
23:00
 
Юрă вăчăри (12+)

Баннерсем

1 Хурал кӗтесӗ (чат)

Ҫанталӑк

Шупашкарта ҫывӑх вӑхӑтра (23.07.2017 21:00) тӗтреллӗ ҫанталӑк, ҫумӑр ҫума пултарать, атмосфера пусӑмӗ 746 - 748 мм, 14 - 16 градус ӑшӑ пулӗ, ҫил 1-3 м/ҫ хӑвӑртлӑхпа хӗвеланӑҫ енчен вӗрӗ.

Утӑ, 23

1774
243
Пугачёв ҫарӗ Етӗрнене ҫавӑрса илнӗ, анчах тытса илеймен.
1917
100
Пазухин Петр Васильевич, халӑх юрри-кӗввине пухаканӗ вилнӗ.
Пулӑм хуш...Пулӑм хуш...

Ыйтӑм

Телефон ҫине чӑваш гимнне лартма эсир хирӗҫ мар-и?
Ҫук, лартма килӗшместӗп
Тавах сӗнӳшӗн. Лартатӑпах!
Ҫук, эп ӑна лартма тивӗҫлӗ мар
Лартса ӗнтӗ
Ку ыйту маншӑн пӗлтерӗшлӗ мар
Ман телефонра чӑваш кӗвви тахҫанах янрать
Эпир Facebook-ра 1230+
 
 
Сайт пирки | Пулӑшу | Статистика
(c) 2005-2017 Chuvash.Org | МИХ пек регистрациленӗ свидетельство номерӗ: 2017 ҫулхи нарӑсӑн 3-мӗшӗнче алӑ пуснӑ ЭЛ № ФС 77 - 68592. Свидетельствӑна Ҫыхӑну, информаци технологийӗ тата массӑллӑ коммуникаци сферине тӗрӗслесе тӑракан федераллӑ служба (Роскомнадзор) панӑ.
Сайтри материалсене (ытти ҫӑлкуҫсенчен илнисемсӗр пуҫне) CreativeCommons Attribution-ShareAlike 3.0 лицензипе килӗшӳллӗн усӑ курма пулать. Сайтпа ҫыхӑннӑ ыйтусене кунта ярӑр: site(a)chuvash.org