Малтанхи çырăва, «Тăван Ен» лайăхланни çинчен çырнине, Борис Чиндыков («Тăван Ен» редакторĕ) хаçатрах пичетлесе кăларчĕ.
Паллах, хаçат çитменлĕхсемсĕр мар. Вĕсем те пур. Халĕ вĕсене кăтартасшăн:
1. Терминсем. Чăвашсем тахçанах «сăн ÿкерчĕк» сăмаха пĕлеççĕ, «ТЕ» вара темшĕн «фото ÿкерчĕк» сĕнет. //Халĕ 3-мĕш кăларăма пăхнă май унта «сăнÿкерчĕк» те тĕл пулчĕ...
2. Уйăх ячĕсем. «Суварти» текех, кунта та, вырăс ячĕсемпе усă кураççĕ. Чăваш ячĕсем пурăнма тивĕç мар теççĕ-ши? Кăрлач, нарăс — мĕн тери хитре ятсем! Çук, ку хаçатсенче — январь, февраль, … Эпĕ хам сайтра пушшех те вырăсла ячĕсене çырмастăп. Ма? Пĕлмеççĕ пулсан — шутлаччăр кăштах пуçĕсемпе, тăнлаччăр. «Кăрлач» уйăх ячĕ вырăсла мĕнле пулать? Вулаканни хăй шыраса тупсан ку информаци ун пуçĕнче çирĕпрех тытăнса юлать. Юрать-ха, эрне ячĕсене чăвашлисенех усă кураççĕ
3. 2-мĕш кăларăмри кулăш пайне туса çитереймен пулас. «Култараççĕ» ятпа кăларнă та — хăйсем пиркиех çырнă пулĕ. :) Пĕр анекдотне иккĕ пичĕтленĕ, куçарнă чух та çиелтен çеç тунă... «Манăнă арăм манăн чи лайăх туспа...» çыраççĕ. Те «Маннă арăм» вуламалла... «Манăн» вуласан вара... икĕ хут калани пулать.
4. Кăçал эрнере пĕрре тухать пулин те номерĕсем темшĕн виççĕллĕ тухаççĕ — 1-3№, 4-6№, 7-9№... Ăнланап, енчен те çулталăкра ХХХ чухлĕ номер кăларма палăртнă пулнă пулсан, анчах та уява, е ытти сăлтава пула сиктерсе хăварса иккĕллĕ-виççĕллĕ кăларăмсем кăларма тивет. Кунта вара палăртсах хунă пулин те — эрнере 1 тухать тесе — çавах виççĕ номерлă кăларăмсем тăваççĕ. Е пĕтĕмĕшле номере (юлашки кăларăмăн 9754-9756) хăвăртрах 10 пине çитересшĕн? Эрнекун 3-мĕш кăларăмĕ тухрĕ — анчах та çынна çав хаçатри статьяна вулама сĕнес пулсан ман ăна мĕн каламалла? 3-мĕш кăларăмне шырама сĕнмелле, е 7-9 №-лине? 3-мĕш кăларăмне шыраттарсан вăл 1-мĕшне тупать пулĕ...
5. «Чăвашла-вырăсла» пай питĕ чаплă. Кирлĕ те. Анчах та кунта та çитменлĕхсем пур. 3-мĕш кăларăмра çырласен ячĕсене илсе панă. «Пилеш» — вырăсла «Рябина» пулать тесе çырнă. Ÿкерчĕкне те вырнаçтарнă: «Пилеш — красная рябина». Шел те, ÿкерчĕкĕ хура-шурăлла пулнăран вăл сарă е хĕрлине (тен симĕс?) уйăрса илме май çук. :)

Вăт çапла...