blog.domclick.ru сӑнӳкерчӗкӗ

Чӑваш Енре пурӑнакансене кӳршӗ-аршӑпа строительсем канма кансӗрлесрен саккун йышӑннӑ. Ӑна чӳк уйӑхӗн 30-мӗшӗнче ҫирӗплетнӗ.

Асӑннӑ саккунра пӑхса хӑварнӑ тӑрӑх, нумай хваттерлӗ ҫуртсенче 23 сехетрен пуҫласа 7 сехетчен шавлама юрамасть. Строительствӑпа монтаж, юсав ӗҫӗсене 20 сехетрен пуҫласа 8 сехетчен пурнӑҫлама юрамасть.

Шӑматкунпа вырсарникун тата уяв кунӗсенче 22 сехетрен пуҫласа 9 сехетчен шавламалла мар. Строительствӑпа ҫыхӑннӑ ӗҫе 19 сехетрен пуҫласа 9 сехетчен пурнӑҫлама чарнӑ.

13 сехетрен пуҫласа 15 сехетчен те шавламалла мар.

Ҫӗнӗ ҫул каҫхине – раштавӑн 31-мӗшӗнче 22 сехетрен пуҫласа кӑрлачӑн 1-мӗшӗнче 4 сехетчен – шавланӑшӑн явап тыттармӗҫ.

люберцы.рф сӑнӳкерчӗкӗ

Нумай хваттерлӗ ҫуртсенче пурӑнакансем тӗплӗ юсавшӑн ытларах тӳлеме тытӑнӗҫ.

Республикӑн Правительстви ҫав хака 2024 ҫултан ӳстерме йышӑннӑ, малашне 1 тенкӗ те 92 пус ытларах тӳлеме пуҫлӑпӑр. Ку вӑл пӗр тӑваткал метршӑн.

Аса илтерер: асӑннӑ тӳлев виҫи хваттер виҫинчен килет.

Лифтсемсӗр ҫуртсенче пурӑнакансем пӗр тӑваткал метршӑн 9 тенкӗ 22 пус тӳлеме тытӑнӗҫ, лифтсемлӗ ҫуртсенчисем пӗр тӑваткал метршӑн — 10 тенкӗ.

t.me/gazetatavanen каналтан илнӗ сӑнӳкерчӗк

Ҫулталӑк вӗҫлениччен пирӗн республикӑн тӗп хулинче вӑрах вӑхӑт хӑпартакан сахалтан та виҫӗ ҫурта туса пӗтермелле. Кун пирки республика Элтеперӗ Олег Николаев хӑйӗн Телеграм-каналӗнче шантарса каланӑ.

Асӑннӑ ҫӑлкуҫра пӗлтернӗ тӑрӑх, 2023 ҫулхи раштав уйӑхӗнче 366 пайтаҫӑн ыйтӑвӗ татӑлмалла.

Асӑннӑ ҫуртсем «Соляное» микрорайонта, Калинин урамӗнче тата «Ривьера» ҫурт-йӗр комплексӗнче вырнаҫнӑ. Унсӑр пуҫне Энергетиксен урамӗнчи ҫурта туса пӗтересшӗн.

Ӗмӗтре ытти темиҫе объект та пур.

cap.ru сӑнӳкерчӗкӗ

Шупашкар муниципаллӑ округӗнчи 74 ҫынна Кӳкеҫре ҫӗнӗ хваттер парӗҫ.

Хальхи вӑхӑтра вӗсем валли посёлокри Первомайски урамра «Агата» организаци ҫӗнӗ тӑрсах нумай хваттерлӗ ҫурт хӑпартать. Ӗҫе кӑҫал туса пӗтермелле.

Ӗҫ-пуҫ епле пынипе вырӑна ҫитсе ӗнер, юпа уйӑхӗн 18-мӗшнче, муниципалитет округӗн пуҫлӑхӗн тивӗҫӗсене вӑхӑтлӑх пурнӑҫлакан Владимир Михайлов паллашнӑ.

Ҫӗнӗ хваттерсене кивӗ те ишӗлекен ҫурт-йӗр тесе 2017 ҫулхи кӑрлач уйӑхӗн 1-мӗшӗччен йышӑннӑ ҫуртсенче пурӑнакансене куҫарӗҫ.

cap.ru сайтри сӑн

Ҫӗмӗрлери 41 ҫемье ҫӗнӗ ҫуртра пурӑнма тытӑнӗ. Хваттер уҫҫисене вӗсене ӗнер савӑнӑҫлӑ лару-тӑрура панӑ.

Унччен ҫак ҫемьесем Уруков урамӗнчи 27-мӗш ҫуртра пурӑннӑ. Ҫурт авариллӗ тесе йышӑннӑ. Халӗ вӗсене Францев урамӗнче вырнаҫнӑ нумай хваттерлӗ ҫуртри уҫӑсене панӑ.

Кашни хваттер хӑтлӑ, харпӑр кӑмакаллӑ. Картишре ача-пӑча тата спорт лапамӗсем пур. Палӑртмалла: кӑҫал ҫулталӑк вӗҫлениччен Ҫӗмӗрлере авариллӗ ҫуртра пурӑнакан тепӗр 52 ҫынна хваттер уҫҫи памалла.

stroiteh-msk.ru сӑнӳкерчӗкӗ

Чӑваш Енре тӑлӑх ачасене ҫурт-йӗр туянма паракан сертификата малашне 23 ҫула ҫитичченех пама тытӑнӗҫ. Ятарлӑ саккуна улшӑну кӗртнӗ хыҫҫӑн ку цифра 21 ҫулпа танлашӗ.

Ҫурт-йӗр сертификатне призывпа ҫар службине тухакансене, I е II ушкӑнри инвалид пулсан, I ушкӑнри инвалида е вата ҫынна пӑхсан парӗҫ.

Ҫурт-йӗр сертификачӗпе тӑлӑх ачасем хӑйсем пурӑнакан вырӑнта кӑна мар, урӑх ҫӗрте те ҫурт е хваттер туянайӗҫ. Енчен ҫамрӑк ҫын ипотека хваттерӗнче пурӑнать пулсан, ипотека парӑмне вӑл пӗтӗмпех е пӗр пайне ҫав сертификатпа татма пултарӗ.

t.me/nikamran каналтан илнӗ сӑнӳкерчӗк

Чӑваш Енре икӗ хутлӑ ҫурт тӑвакан нумайланнӑ тесе пӗлтерет Телеграмри «Пуринчен малтан. Ҫывӑрса юлмасан» каналта.

Кӑҫалхи ҫур ҫулта пирӗн республикӑра пурӑнакансем икӗ хутлӑ 763 ҫурта регистрациленӗ.

315 ҫемье пӗр хутлӑ ҫурт лартнӑ. 54 ҫын вара виҫӗ хутлӑ ҫурт ҫӗклеме вӑй ҫитернӗ.

ru.freepik.com сӑнӳкерчӗкӗ

Чӑваш Енре оборона комплексӗн ӗҫченӗсем валли аренда ҫурт-йӗрӗ тума пуҫлӗҫ. Кун пирки республика Элтеперӗ «Комсомольская правда» хаҫата панӑ интервьюра палӑртса хӑварнӑ.

Олег Николаев ӗнентернӗ тӑрӑх, Чӑваш Ен ҫурт-йӗр хӑпартассипе малта пыракан регионсен шутӗнче. Республика ӳлӗмрен те малтисен шутӗнче пуласшӑн.

«Президент аренда ҫурт-йӗрне тӑвассипе ҫине тӑрса ӗҫлеме хушать. Хальлӗхе — оборонӑпа промышленность комплексӗн ӗҫченӗсем валли. Эпир вӑл программӑна кӗме палӑртатпӑр. Асӑннӑ комплекса кӗрекен предприятисенче тӑрӑшакансене ҫурт-йӗр мӗн чухлӗ кирлине тишкертӗмӗр. Ку программа пурнӑҫа кӗме тытӑнсан ҫурт-йӗр хӑпартассин кӑтартӑвне чакармасӑр тӑрӑшма май килӗ», – тенӗ республика ертӳҫи.

Прокуратура тунӑ сӑн

Элӗк районӗнчи тӑлӑх прокуратура пулӑшнипе кӑна хваттерлӗ пулнӑ. Каччӑна ашшӗ-амӑшӗсӗр тӑрса юлсан ҫурт-йӗр тивӗҫмешкӗн черете тӑратнӑ.

Хайхискер 18 ҫул тултарнӑ, хваттер вара паман. Хӑй ҫемьеленнӗ, харпӑрлӑхӗнче ҫурт-йӗр пулман. Ҫавна май унӑн укҫа тӳлесе хваттер тара илме тивнӗ. Ҫапла самай нухрат тӑкакланӑ.

Прокуратура вырӑнти администрацие тӑлӑха хваттерпе тивӗҫтерме ыйтса тавӑҫ тӑратнӑ. Кун хыҫҫӑн тин ӑна ҫӗнӗ те хӑтлӑ ҫуртра хваттер уйӑрса панӑ.

cap.ru сайтри сӑн

Тӑвайра пурӑнакан 6 ҫемье унччен авариллӗ ҫуртра пурӑннӑ. Халӗ вара вӗсене ҫӗнӗ хваттер уҫҫине кӗҫех тыттарӗҫ. Документсемпе ҫыхӑннӑ ӗҫсене кӑна вӗҫлемелле. Вара вӗсем ҫӗнӗ те ҫутӑ хваттерте пурӑнма пуҫлӗҫ.

Ҫӗнӗ ҫурта кӗске вӑхӑтра, ҫур ҫулта, туса пӗтернӗ. Римма Погодина ав 80-ран иртнӗ. «Утӑ уйӑхӗнче, хамӑн ҫуралнӑ кунра, ҫӗнӗ пӳрт ӗҫкине тума палӑртрӑм. 80-ран иртнӗ пулсан та тата нумай пурӑнас килет. Ҫӗнӗ хваттерте ҫутӑ, хӑтлӑ, ӑшӑ пуласса иккӗленӳ ҫук», - тенӗ вӑл.